Gammaldansgalla i Naustdal

Naustedalen Spelemannslag skal skipe til gammaldansgalla i Naustdalshallen den 26. oktober og har sikra seg landets mest kjende gammaldansorkester, Dalakopa. Målsetjinga er at dette skal bli ei årviss tilskiping der ein varierar mellom dei fremste gammaldansorkestra i landet.

Naustdal har lange tradisjonar med gammaldanstilskipingar. På syttitalet møtte heile bygda, og meir til, på dei årvisse spelemannsfestane til Naustedalen Spelemannslag. Etter at Naustdal fekk fleirbrukshall sist vinter har spelemannslaget vurdert korleis laget kan nytte hallen. I Førde og andre stader i distriktet blir det skipa til dansegallaer med kjende danseband, så kvifor ikkje gammaldansgalla i Naustdal, seier Einar Eimhjellen frå arrangørlaget.

I samband med tilskipinga blir det konsert med Dalakopa, og deretter dans til langt på natt. Då vil også tilskiparlaget delta.

Dalakopa har vunne 3 Norgesmeisterskap i gammaldansmusikk. I 1993 vart dei nr. 2 i NRK sin konkuranse "Kappspell", og dei fekk 1. plass i Nordisk meisterskap i gammaldansmusikk i 1987. I alt har dei gitt ut 6 CD, LP og kassettar. For LP-en Dalakopa fekk dei Spelemannsprisen.

Gruppa har spesialisert seg i norsk gammaldansmusikk med eit spesielt lydbilde i øst-norsk og trøndersk tradisjon, blanda med amerikansk, dansk og svensk tradisjon.

Gruppa består av 8 medlemer med 3 feler, fløyte, 2 trekkspel, gitar og bass. Leiar for gruppa er Bent Jacobsen. Gruppa stasjonerar i Røros-området, men har medlemer både av dansk, svensk og amerikansk opphav.

Gammaldansorkesteret "Dalakopa" som kjem til Naustdal i oktober
Bak frå v. Ole Anders Feragen, Thore Härdelin, Jens Nygård, Bent Jacobsen. Og Stein Nygård.
Framme frå v. Mary Barthelemy, Oline Sofie Bakkom og Roar Kjeldsberg.

Meir om Dalakopa kan du lese her  http://www.sverren.net/f_dalakopa.htm

---

For info kontakt  einar.eimhjellen@naustdal.kommune.no